Oʻzbekiston xorijiy investorlarga 128 ta yangi neft-gaz blokini taklif etadi

Oʻzbekiston neft-gaz sohasida geologik qidiruv, konlar samaradorligini oshirish va xomashyoni chuqur qayta ishlash yoʻnalishlarida xorijiy kompaniyalar bilan hamkorlikni kengaytirishni maqsad qilgan. Bu haqda Prezident Shavkat Mirziyoyev 16 oktyabr kuni yoqilgʻi-energetika tarmogʻi investorlari bilan oʻtkazilgan ochiq muloqotda maʼlum qildi.

Davlat rahbarining soʻzlariga koʻra, hozirda Ozarbayjonning SOCAR va Buyuk Britaniyaning BP kompaniyalari Ustyurt mintaqasidagi oltita investitsiya blokida geologik qidiruv ishlarini olib bormoqda. Shuningdek, boshqa hududlarda xorijiy hamkorlarga taklif etilishi rejalashtirilgan yana 128 ta blok tayyorlangan. Dastlabki hisob-kitoblarga koʻra, ushbu bloklarning resurslari 5,8 trln kub metr tabiiy gaz va 560 mln tonna suyuq uglevodorodlarni tashkil etadi.

Prezident bu resurslarni oʻzlashtirishda raqobat, shaffoflik va iqtisodiy samaradorlik asosiy mezonga aylanishi kerakligini taʼkidladi. 128 ta blokning aniq joylashuvi, taklif etish muddatlari va hamkorlikning taxminiy shartlari hozircha aniqlanmagan.