Oʻzbekiston energetika uskunalarini mahalliylashtirishga 850 million dollar sarflamoqchi

Oʻzbekiston Prezidenti Shavkat Mirziyoyev yoqilgʻi-energetika sohasidagi investorlar bilan ochiq muloqot oʻtkazdi. Davlat rahbari mamlakatning tabiiy resurslari, sanoat salohiyati va yosh ishchi kuchini xalqaro energetika hamkorligi uchun imkoniyat sifatida taʼkidladi.

2025-yilda sohada ishlatilgan mahalliy tovar va xizmatlarning umumiy qiymati 740 million dollarni tashkil etdi. China Energy 8 ta akkumulyator majmuasini qurishda foydalangan mahsulotlarning 40 foizi Oʻzbekistonda ishlab chiqarilgan, qiymati 200 million dollarga yetgan. Davlat rahbari mahalliy ishlab chiqarish hajmini 3-4 barobar oshirish mumkinligini aytib, korxonalarni narx, sifat va standartlar boʻyicha raqobatbardoshlikni oshirishga chaqirdi.

Import qilinadigan energetika uskunalarini mahalliylashtirish uchun 850 million dollarlik 12 ta loyiha tayyorlangan. Jizzax viloyatining Forish tumanida atom elektr stansiyasi qurilishi uchun zarur mahsulotlar ishlab chiqarishga moʻljallangan maxsus sanoat zonasi yaratilishi eʼlon qilindi. Investorlarga soliq va boj imtiyozlari taklif etildi.