Oltita davlat olimlari Oltin Oʻrda tarixini birgalikda oʻrganadi

Oltita davlat olimlari dasht sivilizatsiyasini, xususan, Oltin Oʻrda va Joʻchi ulusi tarixini birgalikda oʻrganish boʻyicha kelishib oldi. 24KZ xabariga koʻra, ilmiy konsorsium tuzish toʻgʻrisidagi bitim Almatida imzolangan. Konsorsiumga Qozogʻiston, Turkiya, Oʻzbekiston, Qirgʻiziston, Ozarbayjon va Mongoliya fanlar akademiyalari kirdi.

Bitim doirasida mutaxassislar birgalikda arxeologik ekspeditsiyalar oʻtkazadi, qoʻlyozmalar bilan ishlaydi va ilmiy nashrlar tayyorlaydi. Mavzu boʻyicha barcha tarixiy materiallarni raqamlashtirib, yagona reestrga jamlash rejalashtirilgan. Hamkorlik rejasi besh yillik davrga moʻljallangan.

Qozogʻiston Milliy fanlar akademiyasi prezidenti Oqilbek Qurishboyev bu noyob tarixiy maʼlumotlarni raqamli formatda birlashtirish hozir juda muhimligini aytdi. U bu maqsadda Xitoy akademiklari bilan muzokaralar olib borayotganini va Fudan universiteti ishlab chiqqan raqamli modulni ishlatmoqchi ekanliklarini bildirdi. Ikkinchi variant sifatida Garvard universiteti koʻrib chiqilmoqda.