Altı ölkənin alimləri Qızıl Orda tarixini birgə öyrənəcək

Altı ölkənin alimləri bozqır sivilizasiyasını, xüsusilə Qızıl Orda və Cöçi Ulusunun tarixini birgə öyrənmək barədə razılığa gəliblər. 24KZ-nin məlumatına görə, elmi konsorsiumun yaradılması haqqında saziş Almatıda imzalanıb. Konsorsiuma Qazaxıstan, Türkiyə, Özbəkistan, Qırğızıstan, Azərbaycan və Monqolustanın elmlər akademiyaları daxil olub.

Sazişə əsasən mütəxəssislər birgə arxeoloji ekspedisiyalar aparacaq, əlyazmaları ilə işləyəcək və elmi nəşrlər hazırlayacaqlar. Bu mövzu üzrə bütün tarixi materialların rəqəmsallaşdırılaraq vahid reyestrdə toplanması planlaşdırılır. Əməkdaşlıq planı beş il müddətinə hazırlanıb.

Qazaxıstan Milli Elmlər Akademiyasının prezidenti Akılbek Kürişbayev bu unikal tarixi məlumatların rəqəmsal formatda birləşdirilməsinin hazırda çox vacib olduğunu bildirib. O, bu məqsədlə Çin akademiklərlə danışıqlar apardıqlarını və Fudan Universitetinin hazırladığı rəqəmsal modulu istifadə etmək istədiklərini deyib. İkinci variant kimi Harvard Universiteti nəzərdən keçirilir.