Алтын Орда тарихын алты елдің ғалымдары бірлесіп зерттейді

Алты елдің ғалымдары дала өркениетін, атап айтқанда Алтын Орда мен Жошы ұлысының тарихын бірлесіп зерттеуге келісті. 24KZ арнасының хабарлауынша, ғылыми консорциум құру туралы келісімге Алматыда қол қойылды. Оған Қазақстанның, Түркияның, Өзбекстанның, Қырғызстанның, Әзербайжанның және Моңғолияның ғылым академиялары кірді.

Келісім аясында мамандар бірлескен археологиялық экспедициялар жүргізіп, қолжазбалармен жұмыс істеп, ғылыми басылымдар дайындайды. Тақырып бойынша барлық тарихи материалдарды цифрландырып, бірыңғай тізілімге жинау жоспарланған. Ынтымақтастық жоспары бес жылға есептелген.

Қазақстан Ұлттық ғылым академиясының президенті Ақылбек Құрышбаев бұл бірегей тарихи деректерді цифрлық форматта біріктірудің қазір өте маңызды екенін атап өтті. Ол осы мақсатта қытай академиктерімен келіссөздер жүргізіп жатқанын және Фудань университеті әзірлеген цифрлық модульді пайдаланғысы келетінін айтты. Екінші нұсқа ретінде Гарвард университеті қарастырылуда.