Endi qaysi hududda qanday quvvat zarurligi oldindan rejalashtirilib, tayyor loyihalar ochiq tanlovga chiqariladi

Prezident Shavkat Mirziyoyev yoqilgʻi-energetika sohasidagi investorlar bilan ochiq muloqot oʻtkazmoqda. Prezident eslatdiki, “yashil” quvvatlarni tez yaratish uchun birinchi bosqichda loyihalar koʻpincha investorlar taklif qilgan hududlarda joylashtirilgan. Bu koʻp sarmoya jalb qilish imkonini bergan, biroq ayrim joylarda quvvatlar toʻplanib, elektrni boshqa hududlarga yetkazish xarajatlari oshgan.

“Bizga alohida-alohida elektr stansiyalari emas, uzviy bogʻlangan energetika tizimi kerak”, dedi Prezidentimiz. Shunga koʻra endi qaysi hududda qanday quvvat zarurligi oldindan rejalashtiriladi va tayyor loyihalar ochiq tanlovga chiqariladi. Tanlovga qoʻyiladigan har bir loyiha boʻyicha yer maydoni, tarmoqqa ulanish nuqtasi va muddati, elektrni xarid qilish hamda toʻlov shartlari avvaldan eʼlon qilinadi. Barcha investorlar uchun talablar teng boʻladi, toʻlov intizomi va xatarlarni kamaytirish mexanizmlari mustahkamlanadi.

Yaqinda umumiy quvvati 2 ming 200 megavatt boʻlgan 6 ta quyosh va shamol stansiyasining loyihasi ochiq tanlovga chiqariladi. Davlatimiz rahbari investorlarni ularda ishtirok etishga taklif qildi.