Pashinyan: Armaniston va Ozarboyjon hududlarni oʻzaro almashishi kerak

Bosh vazir Pashinyan Olmaota deklaratsiyasi asosida chegarani delimitatsiya va demarkatsiya qilish natijasida Armanistonning maydoni 29 743 km² ga teng boʻlishi kerakligini aytdi. Uning fikricha, chegaraning ikki tomonida ham anklav va eksklavlar qolmasligi kerak, buning uchun ikki davlat “tengma-teng nisbatda hududlar almashishi” lozim.

Pashinyan barcha yoʻllar va kommunikatsiyalarni ochishni qoʻllab-quvvatlashini ham bildirdi. Gap, jumladan, Ozarboyjon hududi orqali Armanistondan Armanistonga va Armaniston hududi orqali Ozarboyjondan Ozarboyjonga tranzit qatnovini yoʻlga qoʻyish haqida bormoqda. Yana bir shart sifatida u Yerevan va Bokuning bir-biriga nisbatan har qanday daʼvolardan butunlay voz kechishini aytdi hamda “Qorabogʻ, Gardman, Shirvon, Naxichevan” mantigʻini va “Gʻarbiy Ozarboyjon” mantigʻini tilga oldi.

Pashinyan tinchlikni aynan shunday shaklda taʼminlash qanchalik haqiqatga yaqinligi masalasini eng muhim masala deb atadi. Uning soʻzlariga koʻra, Turkmanistonda Ozarboyjon prezidenti Ilhom Aliyev bilan muloqotlardan soʻng, bunday imkoniyat mavjudligi haqida dastlabki taassurot paydo boʻlgan. “Yaqin vaqt ichida biz ushbu imkoniyatni roʻyobga chiqarish va uni haqiqatga aylantirish bilan shugʻullanamiz”, dedi u. Tomonlar chegaraning birinchi qismi boʻyicha 2024-yil aprel oyida dastlabki tarzda kelishib olgan, 2025-yil avgustida esa ikki davlat Tashqi ishlar vazirliklari tinchlik shartnomasi loyihasini eʼlon qilgan edi. Ozarboyjon rasmiylari hali munosabat bildirmagan.