Oʻzbekiston va Jahon banki investitsiya jalb qilishni muhokama qildi

Oʻzbekiston va Jahon banki guruhi iqtisodiy oʻsish istiqbollari, xususiy investitsiyalarni jalb qilish va yangi ish oʻrinlarini yaratish masalalarini muhokama qildi. Uchrashuv 16-oktyabr kuni Bangkokda, Oʻzbekiston Bosh vazir oʻrinbosari — iqtisodiyot va moliya vaziri Jamshid Qoʻchqarov bilan Jahon banki guruhi prezidenti Ajay Banga oʻrtasida boʻlib oʻtdi. Muzokaralar Xalqaro valyuta jamgʻarmasi va Jahon bankining yillik yigʻilishlari doirasida oʻtkazildi.

Muzokaralarda Jahon bankining operatsiyalar boʻyicha boshqaruvchi direktori Anna Bjerde, Xalqaro moliya korporatsiyasining Yaqin Sharq va Markaziy Osiyo boʻyicha mintaqaviy vitse-prezidenti Imad Fakhuri, Markaziy bank raisi oʻrinbosari Nodirbek Ochilov hamda vazir maslahatchisi Jasur Qarshibayev ishtirok etdi. Tomonlar Oʻzbekistondagi makroiqtisodiy tendensiyalar, islohotlar jarayoni va Jahon banki guruhi bilan hamkorlikni kengaytirish imkoniyatlarini koʻrib chiqdi.

Ustuvor yoʻnalishlar sifatida infratuzilma va energetika, agrobiznes, sogʻliqni saqlash va turizmni rivojlantirish, shuningdek yuqori qoʻshilgan qiymatli mahsulot ishlab chiqarishni oshirish muhokama qilindi. AgriConnect tashabbusi hamda suv resurslarini boshqarish samaradorligini oshirishga qaratilgan Water Compact dasturi ham koʻrib chiqildi. Tomonlar hamkorlikni davom ettirish va ushbu sohalardagi tashabbuslarni kengaytirishga kelishib oldilar.