Özbəkistan və Dünya Bankı investisiya cəlbini müzakirə etdi

Özbəkistan və Dünya Bankı Qrupu iqtisadi artımın perspektivlərini, özəl investisiyaların cəlb edilməsini və yeni iş yerlərinin yaradılmasını müzakirə edib. Görüş oktyabrın 16-da Benqkokda, Özbəkistanın Baş nazirinin müavini və İqtisadiyyat və Maliyyə naziri Camşid Küçkarovun Dünya Bankı Qrupunun prezidenti Ajay Banqa ilə görüşü çərçivəsində keçirilib. Danışıqlar Beynəlxalq Valyuta Fondu və Dünya Bankının illik iclaslarının həşiyəsində aparılıb.

Danışıqlarda Dünya Bankının əməliyyatlar üzrə idarəedici direktoru Anna Bjerde, Beynəlxalq Maliyyə Korporasiyasının Yaxın Şərq və Mərkəzi Asiya üzrə regional vitse-prezidenti İmad Fahuri, Mərkəzi Bankın sədr müavini Nodirbek Ocilov və nazirin məsləhətçisi Jasur Qarşıbayev iştirak edib. Tərəflər Özbəkistandakı makroiqtisadi tendensiyaları, aparılan islahatların gedişini və Dünya Bankı Qrupu ilə əməkdaşlığın genişlənmə imkanlarını nəzərdən keçiriblər.

Müzakirə olunan əsas istiqamətlər arasında infrastruktur və enerji, aqrobiznes, səhiyyə və turizmin inkişafı, habelə yüksək əlavə dəyərli məhsul istehsalının artırılması olub. Kənd təsərrüfatının inkişafına yönəlmiş AgriConnect təşəbbüsü və su ehtiyatlarının idarə olunmasını təkmilləşdirməyi hədəfləyən Water Compact proqramı da müzakirə edilib. Tərəflər əməkdaşlığı davam etdirməyi və bu sahələrdəki təşəbbüsləri genişləndirməyi razılaşdırıblar.