Fuzuli shahriga bugungacha 3 153 nafar aholi qaytdi

Ozarbayjon Davlat shaharsozlik va arxitektura qoʻmitasining maʼlumotiga koʻra, bugungacha Fuzuli shahriga 827 oila, jami 3 153 kishi qaytgan. Qoʻmita shaharda turar joy majmualari qurilishi bilan birga ijtimoiy infratuzilma ham rivojlantirilayotganini maʼlum qildi.

Shaharda Oʻzbekiston xalqining sovgʻasi boʻlgan, 960 oʻquvchiga moʻljallangan Mirzo Ulugʻbek nomidagi toʻliq oʻrta maktab, 240 oʻrinli bolalar bogʻchasi hamda Qozogʻiston xalqining sovgʻasi boʻlgan, 600 bola uchun moʻljallangan Qurmongʻazi nomidagi Bolalar ijodiyot markazi foydalanishga topshirildi. 2020-yilda bosqindan ozod etilgan Fuzuli zamonaviy shaharsozlik tamoyillari asosida qayta qurilmoqda va “Buyuk qaytish”ning muhim ramzlaridan biriga aylanmoqda.

2040-yilgacha boʻlgan Bosh reja asosida shahar hududi 1 943 gektarga, aholisi 50 ming kishiga, turar joy fondi esa 1,52 million kvadrat metrga yetkazilishi rejalashtirilgan. Sakkiz oy ichida uchishlarni qabul qilishga tayyor holatga keltirilgan Fuzuli xalqaro aeroporti, Zafar yoʻli (101 km), Ahmadbayli–Fuzuli–Shusha (81,7 km) va Fuzuli–Hadrut (12,3 km) avtomobil yoʻllari mintaqaviy aloqalarni mustahkamlamoqda. Umumiy sigʻimi 15,5 million kubometr boʻlgan Kondalanchay suv omborlari majmui 6 200 gektar qishloq xoʻjaligi yerini sugʻorish imkonini beradi.