Füzuli şəhərinə indiyədək 3 153 nəfər qayıdıb

Azərbaycan Dövlət Şəhərsalma və Arxitektura Komitəsinin verdiyi məlumata görə, bu günədək Füzuli şəhərinə 827 ailə, cəmi 3 153 nəfər qayıdıb. Komitə şəhərdə yaşayış komplekslərinin tikintisi ilə yanaşı, sosial infrastrukturun da inkişaf etdirildiyini bildirib.

Şəhərdə özbək xalqının hədiyyəsi olan 960 şagird yerlik Mirzə Uluqbəy adına tam orta məktəb, 240 yerlik uşaq bağçası və qazax xalqının hədiyyəsi olan, 600 uşaq üçün nəzərdə tutulmuş Kurmanqazı adına Uşaq Yaradıcılıq Mərkəzi istifadəyə verilib. 2020-ci ildə işğaldan azad edilmiş Füzuli müasir şəhərsalma prinsipləri əsasında yenidən qurulur.

2040-cı ilədək Baş Plana əsasən şəhərin ərazisinin 1 943 hektara, əhalisinin 50 min nəfərə, yaşayış fondunun isə 1,52 milyon kvadratmetrə çatdırılması nəzərdə tutulur. Cəmi 8 ay ərzində uçuşları qəbul etməyə hazır vəziyyətə gətirilən Füzuli Beynəlxalq Hava Limanı, Zəfər yolu (101 km), Əhmədbəyli–Füzuli–Şuşa (81,7 km) və Füzuli–Hadrut (12,3 km) yolları nəqliyyat əlaqələrini gücləndirir. Köndələnçay su anbarları kompleksi 6 200 hektar əkin sahəsini suvarmağa imkan verir.