Astanada Turkiy davlatlar tashkiloti axborot vazirlarining yigʻilishi oʻtdi

Turkiy davlatlar tashkiloti (TDT) aʼzo davlatlarining axborot sohasi uchun javobgar vazirlari va yuqori lavozimli shaxslari Astanada 8-yigʻilishga toʻplanishdi. Egemen Qazaqstan xabariga koʻra, yigʻilishda Qozogʻiston Madaniyat va axborot vazirligining birinchi vitse-vaziri Qanat Yskakov, TDT Bosh kotibining oʻrinbosari Ömer Koçaman, shuningdek, Oʻzbekiston, Turkiya, Qirgʻiziston va Ozarbayjon vakillari ishtirok etdi.

Yskakov zamonaviy texnologiyalarning media sohasiga taʼsirini taʼkidlab, axborot maydonidagi dolzarb xatarlarni qayd etdi. U raqamli texnologiyalar va sunʼiy intellektning jadal rivojlanishi media sohasini, axborot tarqatish usullarini va auditoriya bilan aloqa yoʻllarini tubdan oʻzgartirayotganini aytdi. Uning soʻzlariga koʻra, sunʼiy intellekt yangi imkoniyatlar ochsa-da, mavjud xavflarni ham kuchaytirmoqda: haqiqiy video, surat va audio yozuvdan ajratish qiyin boʻlgan soxta materiallar yaratish endi koʻp mablagʻ talab qilmaydi.

Ishtirokchilar deepfakeʼlarni aniqlash, axborot haqiqiyligini tezkor tekshirish, milliy axborot agentliklari aloqalarini mustahkamlash hamda jurnalistlarning yangi texnologiyalar bilan ishlash koʻnikmalarini oshirish masalalarini muhokama qildilar. Yigʻilish xalqaro “Astana Media Week” media forumi doirasida oʻtdi. Ishtirokchilar qoʻshma kommyunike imzoladilar; navbatdagi, 9-yigʻilish Qirgʻiziston poytaxti Bishkekda oʻtkaziladi.