Астанада Түркі мемлекеттері ұйымы ақпарат министрлерінің отырысы өтті

Түркі мемлекеттері ұйымына (ТМҰ) мүше елдердің ақпарат саласына жауапты министрлері және жоғары лауазымды тұлғалары Астанада 8-ші отырысқа жиналды. Egemen Qazaqstan хабарлайынша, жиынға Мәдениет және ақпарат бірінші вице-министрі Қанат Ысқақов, ТМҰ Бас хатшысының орынбасары Өмер Кожаман, сондай-ақ Өзбекстан, Түркия, Қырғызстан және Әзербайжан өкілдері қатысты.

Қанат Ысқақов заманауи технологиялардың медиа саласына ықпалына тоқталып, ақпарат кеңістігіндегі өзекті сын-қатерді атап өтті. Цифрлық технологиялар мен жасанды интеллекттің қарқынды дамуы медиа саласын, ақпарат тарату тәсілдерін және аудиториямен байланыс орнату жолдарын түбегейлі өзгертіп жатқанын айтты. Оның сөзінше, жасанды интеллект жаңа мүмкіндіктер ашумен қатар, бар қауіп-қатерді күшейтіп отыр: шынайы бейне, сурет пен дыбыс жазбасынан қиын ажыратылатын жалған материалдарды жасау енді көп қаражатты қажет етпейді.

Қатысушылар дипфейкті анықтау, ақпараттың шынайылығын жедел тексеру, ұлттық ақпарат агенттіктерінің байланысын нығайту және журналистердің жаңа технологиялармен жұмыс істеу дағдыларын жетілдіру мәселелерін талқылады. Отырыс халықаралық Astana Media Week медиафорумы аясында өтті. Қатысушылар ортақ коммюникеге қол қойды. Келесі, 9-шы отырыс Қырғыз Республикасының астанасы Бішкекте өтеді.