Sirdaryo-2 elektr stansiyasi shu qishdanoq energetika tizimini mustahkamlaydi

Fransiyaning EDF kompaniyasi Yevropa, Yaqin Sharq va Markaziy Osiyo boʻyicha ijrochi vitse-prezidenti Sedrik Lebush 16 oktyabr kuni Shavkat Mirziyoyevning yoqilgʻi-energetika tarmogʻi investorlari bilan oʻtkazgan uchrashuvida, 1600 MVt quvvatli Sirdaryo-2 bugʻ-gaz elektr stansiyasi shu qish mavsumidayoq Oʻzbekiston energetika tizimini mustahkamlay boshlashini maʼlum qildi.

Lebush, shuningdek, Siemens va Nebras hamkorligida qurilayotgan Surxondaryo bugʻ-gaz stansiyasida qurilish ishlarining 75 foizi bajarilganini aytdi. EDF, shuningdek, Eolus bilan hamkorlikda Buxoro yaqinida 500 MVt quvvatli shamol elektr stansiyasi loyihasi boʻyicha bayonnoma imzolanganini va loyihada energiyani saqlash tizimi ham koʻzda tutilganini bildirdi. Kompaniya davlat-xususiy sheriklik asosida elektr tarmoqlarini modernizatsiya qilishda ishtirok etishdan manfaatdor.

Sirdaryo-2 Sirdaryo viloyatining Boyovut tumanida joylashgan. 25 sentyabr kuni sinov-sozlash ishlari paytida stansiyaning 1600 MVt quvvati favqulodda oʻchib qolgan va bir qator hududlarda elektr taʼminotida uzilishlarga olib kelgan. Iyul oyida Mirziyoyev stansiya joyi notoʻgʻri tanlanganini tanqid qilgan va gaz yetkazish uchun qoʻshimcha 300 million dollar kerakligini aytgan.