Afgʻonistonlik radikallar sayyoh qiyofasida Markaziy Osiyoga kirishga urinmoqda

Rossiya tashqi ishlar vaziri Sergey Lavrov Afgʻonistondagi radikallarning ushbu mamlakatdan Markaziy Osiyo va Rossiyaga xavf solish uchun foydalanmoqchi ekanini maʼlum qildi. U KXSHT, MDH va SHHTning Markaziy Osiyo hamda Afgʻoniston xavfsizligiga bagʻishlangan anjumanida soʻz soʻzladi. Xabar «24.kg» nashri maʼlumotiga koʻra berildi.

Lavrovning soʻzlariga koʻra, Afgʻonistonning Tojikiston, Turkmaniston va Oʻzbekiston bilan chegaradosh hududlarida hali ham koʻplab terrorchi va ekstremistik guruhlar, ularning lagerlari hamda tayanch punktlari saqlanib qolmoqda. Bu guruh aʼzolari Markaziy Osiyo davlatlariga kirishga urinib, oʻzlarini qochqin va turist qilib koʻrsatmoqda. Asosiy xavf ISHID-Xuroson jangarilaridan kutilmoqda; bu guruh ISHID xalqaro terrorchilik tashkilotining mintaqaviy boʻlimi hisoblanadi.

Lavrov Panj daryosining narigi tomonidagi «terrorchilik internatsionali»ga Markaziy Osiyo, Shimoliy Kavkaz va uygʻur millatiga mansub jangarilar biriktirilganini, ular Yaqin Sharq hamda Afrikadagi qurolli nizolarda tajriba orttirganini aytdi. Uning qoʻshimcha qilishicha, insofsiz tashqi kuchlar Afgʻonistondagi jarayonlardan gʻarazli manfaatlari yoʻlida foydalansa, xavf yanada ortadi, bu manfaatlarning esa Markaziy Osiyo va Rossiya manfaatlari bilan umumiyligi yoʻq. ISHID jahonning bir qator mamlakatlari va xalqaro tashkilotlar tomonidan «terrorchilik tashkiloti» deb topilgan.