Turkmaniston Prezidenti “Turkmanning Oltin asri” mukofoti uchun tanlov eʼlon qildi

Turkmaniston Prezidenti “Turkmanning Oltin asri” nomli mukofotni qoʻlga kiritish uchun tanlov eʼlon qilinishi toʻgʻrisidagi qarorni imzoladi. Tanlov adabiyot, madaniyat va sanʼat xodimlariga, ijodkor boshqa shaxslarga, havaskor yosh xonandalarga va iqtidorli bolalarga ochiq. Qarorda koʻrsatilishicha, maqsad milliy madaniyat, madaniy meros va qadimiy qadriyatlarni kamolotga yetgan asarlar orqali aks ettiruvchi iqtidorli ijodkorlarni aniqlash, ularning eng yaxshilarini tanlash va ragʻbatlantirish, turkman adabiyotini keng koʻlamli asarlar bilan boyitish hamda milliy sanʼatni rivojlantirishdir.

Qarorga koʻra gʻoliblar belgilangan yoʻnalishlar boʻyicha aniqlanadi. Tanlov doirasida havaskor yosh xonandalar orasida “Ýaňlan, Diýarym!” telebäsleşigi, dutarchi bagʻshi-sozandalar orasida “Çalsana, bagşy!” tanlovi va iqtidorli bolalar orasida “Garaşsyzlygyň merjen däneleri” tanlovi eʼlon qilindi.

Prezident qarorining toʻliq matni “Adabiyot va sanʼat” gazetasida chop etiladi.