Түрікменстан Президенті «Түрікмен Алтын ғасыры» сыйлығына байқау жариялады

Түрікменстан Президенті «Түрікмен Алтын ғасыры» атты сыйлықты алу үшін байқау жариялау туралы Жарлыққа қол қойды. Байқау әдебиет, мәдениет және өнер қызметкерлеріне, шығармашылықпен айналысатын басқа адамдарға, әуесқой жас әншілерге және дарынды балаларға ашық. Жарлықта көрсетілгендей, мақсат ұлттық мәдениетті, мәдени мұраны және ежелгі құндылықтарды кемел шығармалар арқылы бейнелейтін дарынды шығармашылық адамдарды анықтау, олардың ең шеберлерін таңдап, ынталандыру, түрікмен әдебиетін ауқымды туындылармен байыту және ұлттық өнерді дамыту.

Жарлыққа сәйкес, жеңімпаздар белгіленген бағыттар бойынша анықталады. Байқау аясында әуесқой жас әншілер арасында «Ýaňlan, Diýarym!», домбырашы бақсы-сазгерлер арасында «Çalsana, bagşy!», дарынды балалар арасында «Garaşsyzlygyň merjen däneleri» байқаулары жарияланды.

Түрікменстан Президентінің Жарлығы «Edebiýat we sungat» газетінде толық жарияланады.