Fargʻona vodiysi elektr energiyasining bir qismini boshqa hududlardan oladi

Fargʻona, Andijon va Namangan viloyatlarining elektr energiyasiga boʻlgan ehtiyojining bir qismi Oʻzbekistonning boshqa hududlaridagi ishlab chiqarish hisobiga qoplanmoqda. Yangi sanoat zonalari va yirik korxonalarning ishga tushishi fonida elektr tarmoqlaridagi yuklama oshishi aytilgan. Bu haqda 16 oktyabrda Prezident Shavkat Mirziyoyev yoqilgʻi-energetika sohasi investorlari bilan ochiq muloqotda maʼlum qildi.

Davlat rahbari soha rivojlanishining dastlabki bosqichida tiklanadigan energetika quvvatlarini tezda yaratish ustuvor boʻlganini taʼkidladi. Loyihalar investorlar taklif etgan hududlarda joylashtirilgan. Bu yondashuv katta investitsiyalarni jalb qilgan, biroq ayrim hududlarda quvvat ortiqcha boʻlib, elektr energiyasini boshqa hududlarga uzatish xarajatlari oshgan.

Davlat kelajakda qayerda qanday generatsiya quvvatlari kerakligini oldindan belgilab, tayyorlangan loyihalarni ochiq tanlovlarga chiqarishni rejalashtirmoqda. 2027-yil 1-martgacha tarmoqqa ulanish imkoniyatlari xaritasi taqdim etiladi. 2030-yilgacha 5 ming km elektr tarmoqlari, 16 ta yirik podstansiya va 4,5 GVt gacha energiya saqlash quvvati barpo etilishi rejalashtirilgan.