Xorijiy investorlar Oʻzbekistondagi energetika rejalarini ochiqladi

Xorijiy investorlar Oʻzbekiston energetika va infratuzilmasini rivojlantirish rejalarini eʼlon qilib, allaqachon kiritilgan mablagʻlar hajmi va yangi loyihalar haqida maʼlumot berishdi. Bayonotlar 16-oktabrda Prezident Shavkat Mirziyoyevning yoqilgʻi-energetika sohasi vakillari bilan ochiq muloqotida yangradi. Mirziyoyev soʻnggi yillarda energetika sohasiga 35 milliard dollar xorijiy investitsiya jalb etilganini aytdi. Investorlar kelgan mamlakatlar soni esa oʻntadan oshdi.

Acwa boshqaruv raisi Muhammad Abunayyan Qoraqalpogʻistonda sutkasiga 1 GVt quvvatni taʼminlaydigan loyiha boʻyicha kelishuv imzolanganini va loyiha qiymati taxminan 2 milliard dollar ekanini maʼlum qildi. Masdar bosh ijroiya direktori Muhammad Jamil al-Ramahi kompaniya 2019-yildan beri Oʻzbekiston bozorida ishlayotganini, unga 2 milliard dollardan ortiq sarmoya kiritganini va 2 GVt dan ortiq qayta tiklanuvchi energetika loyihalarini amalga oshirganini aytdi. Kompaniya yana 2 GVt quvvat yaratishni rejalashtirmoqda.

China Energy International besh yil ichida mamlakatdagi loyihalari hajmi 6 milliard dollardan oshganini bildirdi. Cengiz Holding boshqaruv raisi Mehmet Cengiz kompaniyaning Oʻzbekiston iqtisodiyotiga investitsiyasi 900 million dollardan oshganini va 2026-yil oxirigacha Jizzax viloyatidagi elektr stansiyasini ishga tushirishni rejalashtirayotganini aytdi. Vision Invest yangi Toshkent aeroportini qurishda ishtirok etayotganini bildirdi. Mirziyoyev yangi xalqaro aeroport mamlakatning birinchi “yashil” aeroporti boʻlishini taʼkidladi.