Xarici investorlar Özbəkistanda enerji planlarını açıqladılar

Xarici investorlar Özbəkistanın enerji və infrastruktur sahəsinin inkişafı üzrə planlarını elan edib, artıq yatırılmış vəsaitlər və yeni layihələr barədə məlumat veriblər. Bəyanatlar oktyabrın 16-da Prezident Şavkat Mirziyoyevin yanacaq-energetika sektorunun nümayəndələri ilə açıq dialoqunda səsləndirilib. Mirziyoyev bildirib ki, son illərdə enerji sektoruna 35 milyard dollar xarici investisiya cəlb olunub. İnvestor ölkələrinin sayı isə on ölkəni keçib.

Acwa-nın idarə heyətinin sədri Məhəmməd Əbunayyan Qaraqalpaqıstanda sutkalıq 1 QVt gücü təmin edəcək layihə üzrə razılaşmanın imzalandığını və layihənin dəyərinin təxminən 2 milyard dollar olduğunu bildirib. Masdar-ın baş icraçı direktoru Məhəmməd Cəmil əl-Ramahi isə 2019-cu ildən Özbəkistan bazarında fəaliyyət göstərən BƏƏ şirkətinin ölkəyə 2 milyard dollardan çox investisiya yatırdığını və 2 QVt-dan artıq bərpa olunan enerji layihəsi həyata keçirdiyini deyib. Şirkət daha 2 QVt planlaşdırır.

China Energy International son beş ildə ölkədəki layihələrinin ümumi həcminin 6 milyard dolları keçdiyini bildirib. Cengiz Holding-in idarə heyətinin sədri Mehmet Cengiz isə şirkətin investisiyalarının 900 milyon dolları aşdığını və 2026-cı ilin sonuna qədər Cizak vilayətində elektrik stansiyasını istismara verməyi planlaşdırdığını söyləyib. Vision Invest yeni Daşkənd hava limanının tikintisində iştirak etdiyini bildirib. Mirziyoyev yeni beynəlxalq hava limanının ölkənin ilk “yaşıl” hava limanı olacağını qeyd edib.