18–22 oktyabrda Samarqandga kirish va ayrim koʻchalarda harakat vaqtincha cheklanadi

Ichki ishlar vazirligi xabar berishicha, Samarqandda xalqaro tadbirlar oʻtkazilishi munosabati bilan shaharga kirish yoʻllari va bir qator markaziy koʻchalarda transport harakati vaqti-vaqti bilan cheklanadi. 19–20 oktyabrda Markaziy Osiyo mamlakatlari va AQSh tashqi ishlar vazirlarining C5+1 formatidagi uchrashuviga, 21–22 oktyabrda esa bolalar farovonligi va kelajagiga bagʻishlangan butunjahon sammitiga mezbonlik qiladi.

Xususan, 18–22 oktyabr kunlari Ibn Sino, Boʻstonsaroy, Universitet xiyoboni, Registon, Afrosiyob, Namozgoh, Sadriddin Ayniy, Shohbot, Usta Umar Joʻraqulov, Shohizinda, Mirzo Ulugʻbek, Beruniy, Dagʻbit, Rudakiy, Goʻlobod va Oydin yoʻli koʻchalarida harakat cheklanib, haydovchilar uchun aylanma yoʻllar tashkil etiladi. Istisno tariqasida faqat tezkor xizmatlarning maxsus avtotransport vositalariga harakatlanishga ruxsat beriladi. Samarqand viloyati hududidan tranzit oʻtuvchi transport vositalari uchun ham aylanma yoʻnalishlar belgilangan.

Haydovchilar va shahar mehmonlaridan vaqtinchalik noqulayliklarni toʻgʻri tushunish, yoʻllarda xavfsizlikni taʼminlayotgan masʼul xodimlarning talablariga rioya qilish soʻralmoqda.