Rossiya Armanistondagi temir yoʻl ustidan nazoratni saqlab qolishga intilmoqda

Rossiya Armanistonning temir yoʻl infratuzilmasini boshqarishdagi mavqeini saqlab qolishga va Janubiy Kavkazda shakllanayotgan yangi transport yoʻnalishlarida ishtirokini davom ettirishga harakat qilmoqda. Modern.az yozishicha, bu haqda mahalliy ommaviy axborot vositalari xabar bergan. Xabarga koʻra, Rossiyaning Armanistondagi temir yoʻl tarmogʻini boshqarishdagi ishtiroki mintaqada yangi logistika aloqalarini shakllantirish nuqtai nazaridan muhim ahamiyatga ega.

Yerasx yoʻnalishida temir yoʻl infratuzilmasining katta qismini qayta qurish zarur. Turkiya chegarasiga, Qars yoʻnalishiga choʻzilgan yoʻlda esa sovet davridan qolgan relslar, texnik inshootlar va boshqa obyektlar qisman saqlab qolingan. Armaniston uchun asosiy masalalardan biri Turkiya Qarsdan Dilucu oʻtish joyigacha qurgan yoʻl bilan raqobatlasha oladigan yoʻnalish yaratishdir.

Oktyabrning 14-kuni “Rossiya temir yoʻllari” kompaniyasi bosh direktori Oleg Belozyorov Yerevanda Armaniston Bosh vaziri Nikol Pashinyan bilan uchrashdi. Uchrashuvda Gyumri–Axurik–Turkiya chegarasi va Yerasx–Naxchivan yoʻnalishlarini tiklash muhokama qilindi, tomonlar qoʻshma ishchi guruh tuzish toʻgʻrisida kelishib oldilar. Belozyorov, Rossiya bilan tuzilgan imtiyozli shartnomani bekor qilish masalasi muzokaralarda koʻtarilmaganini bildirdi.