Rusiya Ermənistandan Naxçıvana uzanan dəmir yoluna nəzarəti saxlamaq istəyir

Rusiya Ermənistanın dəmir yolu infrastrukturunun idarə olunmasında mövqeyini qorumağa və Cənubi Qafqazda formalaşan yeni nəqliyyat marşrutlarında iştirakını davam etdirməyə çalışır. Modern.az xəbər verir ki, bu barədə yerli KİV məlumat yayıb. Məlumata görə, Rusiyanın Ermənistandakı dəmir yolu şəbəkəsinin idarə olunmasında iştirakı regionda yeni logistika əlaqələrinin formalaşması baxımından mühüm əhəmiyyət daşıyır.

Yerasx istiqamətində dəmir yolu infrastrukturunun böyük hissəsinin yenidən qurulmasına ehtiyac var. Türkiyə sərhədinə, Qars istiqamətinə uzanan xəttdə isə sovet dövründən qalan relslər, texniki qurğular və digər obyektlər qismən saxlanılıb. Ermənistan üçün əsas məsələlərdən biri Türkiyənin Qarsdan Dilucu keçidinə qədər inşa etdiyi xətlə rəqabət apara biləcək marşrutun yaradılmasıdır.

Oktyabrın 14-də “Rusiya Dəmir Yolları”nın baş direktoru Oleq Belozyorov İrəvanda Baş nazir Nikol Paşinyanla görüşüb. Görüşdə Gümrü–Axurik–Türkiyə sərhədi və Yerasx–Naxçıvan xətlərinin bərpası müzakirə olunub, tərəflər birgə işçi qrupunun yaradılması barədə razılığa gəliblər. Belozyorov bildirib ki, Rusiya ilə bağlanmış konsessiya müqaviləsinin ləğvi məsələsi danışıqlarda qaldırılmayıb.