Ресей Ермениядағы темір жол желісін бақылауда ұстап қалуға тырысуда

Ресей Ермения темір жол инфрақұрылымын басқаруда өз ұстанымын сақтауға және Оңтүстік Кавказда қалыптасып жатқан жаңа көлік бағыттарына қатысуды жалғастыруға тырысып жатыр. Modern.az жергілікті БАҚ деректеріне сілтеме жасап хабарлады. Хабарға сәйкес, Ресейдің Ермениядағы темір жол желісін басқаруға қатысуы аймақта жаңа логистикалық байланыстардың қалыптасуы үшін маңызды.

Ерасх бағытында темір жол инфрақұрылымының едәуір бөлігін қайта салу қажет. Түркиямен шекараға, Қарс бағытына созылатын желіде кеңес дәуірінен қалған рельстер, техникалық құрылғылар және басқа объектілер ішінара сақталған. Ермения үшін негізгі мәселелердің бірі — Түркияның Қарстан Дилуджу өткеліне дейін салған желісімен бәсекелесе алатын бағыт құру.

Қазан айының 14-і күні «Ресей темір жолдары» компаниясының бас директоры Олег Белозёров Ереванда Ермения Премьер-министрі Никол Пашинянмен кездесті. Кездесуде Гюмри–Ахурик–Түркия шекарасы және Ерасх–Нахчыван желілерін қалпына келтіру талқыланып, тараптар бірлескен жұмыс тобын құру туралы келісті. Белозёров Ресеймен жасалған концессия шартын бұзу мәселесі келіссөздерде көтерілмегенін мәлімдеді.