AQSh va Markaziy Osiyo davlatlari Oʻrta koridorni birgalikda rivojlantirmoqchi

AQSh va Markaziy Osiyo davlatlari energetika sohasidagi hamkorlikni mustahkamlash, muhim foydali qazilmalarni qazib olish va qayta ishlashni rivojlantirish hamda Transkaspiy xalqaro transport yoʻlagi (TBNM, Oʻrta koridor) rivojlanishi uchun choralar koʻrish niyatida. Interfaks xabar agentligiga koʻra, bu haqda Samarqandda «C5+1» formatida oʻtkazilgan uchrashuv yakunlari boʻyicha qoʻshma bayonotda aytilgan.

Bayonotda energetika hamkorligini mustahkamlash yuqori qoʻshilgan qiymatli integratsiyalashgan yetkazib berish zanjirlarini yaratishga yangi turtki berishi, barqaror iqtisodiy oʻsish va energetika xavfsizligini taʼminlashi qayd etilgan. Tomonlar geologik maʼlumotlarni boshqarish boʻyicha tajriba va ilgʻor usullar almashishni rejalashtirmoqda. Shuningdek, qayta ishlash korxonalarini rivojlantirish va yuqori qoʻshilgan qiymatli mahsulotlar ulushini oshirish nazarda tutilgan.

Oʻrta koridorning rivojlanishi yana bir ustuvor yoʻnalish sifatida koʻrsatilgan. Bu Markaziy Osiyo va AQSh oʻrtasidagi savdo hamda investitsiyalarning kengayishiga va mintaqaviy ishlab chiqaruvchilarning yangi bozorlarga chiqishiga yordam berishi taʼkidlangan. «C5+1» formati 2015-yil sentabrida AQSh bilan Qozogʻiston, Qirgʻiziston, Tojikiston, Turkmaniston va Oʻzbekiston oʻrtasida mintaqaviy masalalarni muhokama qilish uchun tashkil etilgan.