ABŞ və Mərkəzi Asiya ölkələri TBNM-in birgə inkişafını hədəfləyir

ABŞ və Mərkəzi Asiya ölkələri enerji tərəfdaşlığını gücləndirmək, kritik faydalı qazıntıların hasilatını və emalını inkişaf etdirmək, həmçinin Transxəzər Beynəlxalq Nəqliyyat Marşrutunun (TBNM, Orta Dəhliz) inkişafı üçün tədbirlər görmək niyyətindədir. «Report» «İnterfaks»a istinadən xəbər verir ki, bu barədə Səmərqənddə «C5+1» formatında keçirilən görüşün yekunlarına dair birgə bəyanatda bildirilib.

Bəyanatda enerji tərəfdaşlığının gücləndirilməsinin yüksək əlavə dəyərli inteqrasiya olunmuş tədarük zəncirlərinin yaradılmasına yeni təkan verəcəyi, davamlı iqtisadi artım və enerji təhlükəsizliyini təmin edəcəyi qeyd olunub. Tərəflər geoloji məlumatların idarə edilməsi üzrə təcrübə və qabaqcıl üsulları mübadilə etməyi planlaşdırırlar. Həmçinin emal istehsalatlarının inkişaf etdirilməsi və yüksək əlavə dəyərli məhsulların payının artırılması nəzərdə tutulur.

Orta Dəhlizin inkişafı digər prioritet kimi göstərilib və bunun Mərkəzi Asiya ilə ABŞ arasında ticarət və investisiyaların genişlənməsinə, regional istehsalçıların yeni bazarlara çıxmasına kömək edəcəyi bildirilib. Tərəflər regional iqtisadi inteqrasiyanın dərinləşdirilməsi barədə razılığa gəliblər. «C5+1» formatı ABŞ və Qazaxıstan, Qırğızıstan, Tacikistan, Türkmənistan və Özbəkistandan ibarət regional məsələlərin müzakirəsi üçün 2015-ci ilin sentyabrında yaradılıb.