АҚШ пен Орталық Азия елдері Орта дәлізді бірлесіп дамытуды көздеуде

АҚШ пен Орталық Азия елдері энергетикалық серіктестікті нығайтуды, маңызды пайдалы қазба байлықтарын өндіру мен өңдеуді дамытуды, сондай-ақ Транскаспий халықаралық көлік бағытының (ТБНМ, Орта дәліз) дамуы үшін шаралар қабылдауды көздеп отыр. Interfax ақпарат агенттігіне сілтеме жасаған Report.az хабарлауынша, бұл туралы Самарқандта «C5+1» форматында өткен кездесу қорытындылары бойынша бірлескен мәлімдемеде айтылған.

Мәлімдемеде энергетикалық серіктестікті нығайту жоғары қосылған құны бар интеграцияланған жеткізу тізбектерін құруға жаңа серпін беретіні, тұрақты экономикалық өсу мен энергетикалық қауіпсіздікті қамтамасыз ететіні атап өтілген. Тараптар геологиялық деректерді басқару саласындағы тәжірибе мен озық әдістермен алмасуды жоспарлап отыр. Сонымен қатар өңдеу өндірістерін дамытып, жоғары қосылған құны бар өнімдердің үлесін арттыру көзделген.

Орта дәлізді дамыту тағы бір басым бағыт ретінде атап өтілді. Бұл Орталық Азия мен АҚШ арасындағы сауда мен инвестицияны кеңейтуге және өңірлік өндірушілердің жаңа нарықтарға шығуына көмектеседі деп күтілуде. Тараптар өңірлік экономикалық интеграцияны тереңдетуге келісті. «C5+1» форматы 2015 жылдың қыркүйегінде АҚШ пен Орталық Азияның бес елі: Қазақстан, Қырғызстан, Тәжікстан, Түрікменстан және Өзбекстан арасында өңірлік мәселелерді талқылау үшін құрылды.