Oʻzbekiston va AQSh 12 milliard dollarlik 54 ta bitim imzoladi

Oʻzbekiston va Amerika Qoʻshma Shtatlari savdo, investitsiya va texnologik hamkorlik sohalarida umumiy qiymati 12 milliard dollar boʻlgan 54 ta bitim imzoladi. Bu haqda Oʻzbekiston Investitsiyalar, sanoat va savdo vazirligi matbuot xizmati xabar berdi. Bitimlar sanoat, transport va energetika infratuzilmasi, muhim ahamiyatga ega boʻlgan minerallar, moliya sektori, raqamli texnologiyalar, qishloq xoʻjaligi, sogʻliqni saqlash va taʼlim sohalarini qamrab oladi.

Transport sohasida GE Aerospace Oʻzbekiston Airways ning yangi samolyotlari uchun dvigatellar yetkazib berishni nazarda tutadi. Wabtec temir yoʻl texnikasi va ehtiyot qismlar ishlab chiqarishni mahalliylashtirishga koʻmaklashadi. Franklin Templeton, Oppenheimer & Co., Citigroup va BlackRock bilan kelishuvlar oʻzbekistonlik kompaniyalarning xalqaro kapital bozorlariga chiqishi, institutsional investorlarni jalb etish va infratuzilma loyihalarini moliyalashtirishga yoʻnaltirilgan.

Konchilik sanoatida ReElement Technologies, Traxys va Trafigura bilan bitimlar konlarni oʻrganish, mineral resurslarni yetkazib berish hamda muhim minerallar boʻyicha salohiyatni rivojlantirishni nazarda tutadi. Biznes dasturda 400 dan ortiq kompaniya vakillari, jumladan 100 dan ortiq AQSh kompaniyasi ishtirok etdi.