Özbəkistan və ABŞ 12 milyard dollarlıq 54 saziş imzalayıb

Özbəkistan və ABŞ ticarət, investisiya və texnoloji əməkdaşlıq sahəsində ümumi dəyəri 12 milyard dollar olan 54 saziş imzalayıb. Özbəkistanın İnvestisiya, Sənaye və Ticarət Nazirliyinin mətbuat xidməti bu barədə məlumat yayıb. Razılaşmalar sənaye, nəqliyyat və enerji infrastrukturu, kritik mühüm minerallar, maliyyə sektoru, rəqəmsal texnologiyalar, kənd təsərrüfatı, səhiyyə və təhsil sahələrini əhatə edir.

Nəqliyyat sahəsində GE Aerospace Özbəkistan Airways-in yeni təyyarələri üçün mühərriklərin tədarükünü nəzərdə tutur. Wabtec dəmir yolu texnikası və ehtiyat hissələrinin istehsalının lokallaşdırılmasına köməklik göstərəcək. Franklin Templeton, Oppenheimer & Co., Citigroup və BlackRock ilə sazişlər Özbəkistan şirkətlərinin beynəlxalq kapital bazarlarına çıxışına, institusional investorların cəlb edilməsinə və infrastruktur layihələrinin maliyyələşdirilməsinə yönəlib.

Dağ-mədən sənayesində ReElement Technologies, Traxys və Trafigura ilə razılaşmalar yataqların öyrənilməsini, mineral resursların tədarükünü və kritik mühüm minerallar sahəsində kompetensiyaların inkişafını nəzərdə tutur. İşgüzar proqramda 400-dən çox şirkətin nümayəndəsi, o cümlədən 100-dən çox ABŞ şirkəti iştirak edib.