Mirziyoyev AQSh bilan 2035 yilgacha savdo-investitsiya dasturi taklif qildi

Oʻzbekiston Prezidenti Shavkat Mirziyoyev 19 oktabrda Samarqandda Oʻzbekiston-Amerika biznes va investitsiya kengashining ikkinchi majlisi ochilishida ishtirok etdi. Tayyorgarlik ishlari natijasida umumiy qiymati taxminan 12 mlrd dollar boʻlgan 54 ta kelishuv va istiqboldagi tashabbuslar toʻplami shakllantirildi. Ularni amalga oshirish uchun keng qamrovli harakatlar dasturini ishlab chiqish rejalashtirilgan.

Tadbirda AQSh Davlat kotibi Marko Rubio, AQSh prezidentining maxsus elchisi Serjio Gor hamda yetakchi amerikalik kompaniya va banklar vakillari ishtirok etdi. Mirziyoyev ikki davlat munosabatlari yangi sifat darajasiga chiqqanini aytib, iqtisodiy aloqalar mustahkam siyosiy hamkorlikka tayanishi kerakligini taʼkidladi. U, shuningdek, AQSh rahbari Donald Trampning shaxsiy eʼtibor va qoʻllab-quvvatlashining ahamiyatini qayd etdi.

Kengash yangi tashabbuslar ishlab chiqishi, tizimli toʻsiqlarni bartaraf etishi va yirik qoʻshma loyihalarni amalga oshirishi kerakligi taʼkidlandi. Ustuvor yoʻnalishlar sifatida muhim minerallarni qayta ishlash, zamonaviy energetika tizimi, maʼlumotlar markazlari, sunʼiy intellekt va taʼlim sanab oʻtildi. Mirziyoyev, shuningdek, 2035 yilgacha Oʻzbekiston-AQSh savdo-investitsiya va texnologik hamkorlik dasturini ishlab chiqishni taklif qildi.