2027-yildan ishsizlarga beriladigan nafaqa muddati oʻzgaradi

Qozogʻistonda 2027-yil 1-yanvardan ish joyini yoʻqotganlarga tayinlanadigan ijtimoiy toʻlov boʻyicha yangi tartib kuchga kiradi. Toʻlov muddati shaxs uchun necha oy davomida ijtimoiy ajratmalar amalga oshirilganiga bogʻliq boʻladi. Mehnat va aholini ijtimoiy himoya qilish vazirligi tegishli oʻzgarishlarni 2026-yil 9-oktabrdagi 398-sonli buyruq bilan tasdiqladi, deb xabar bermoqda Egemen.kz.

Ish beruvchilar xodimlar uchun ijtimoiy ajratmalarni toʻlaydi, bu mablagʻlar Davlat ijtimoiy sugʻurta jamgʻarmasiga tushadi. Ish joyini yoʻqotgan shaxsga toʻlov ushbu jamgʻarmadan beriladi. Yangi qoidaga koʻra, shaxs uchun 6 oydan 12 oygacha ijtimoiy ajratma amalga oshirilsa, toʻlov bir oyga tayinlanadi. 12 oydan 24 oygacha ajratma qilinsa, toʻlov ikki oy davomida beriladi. 24 oy va undan koʻp muddat ajratma qilingan boʻlsa, toʻlov muddati uch oyni tashkil etadi.

Toʻlov miqdori yetti eng kam ish haqining 45 foizidan oshmasligi kerak. Hisoblashda toʻlov huquqi paydo boʻlgan sanada amalda boʻlgan eng kam ish haqi hisobga olinadi. Toʻlov huquq paydo boʻlgan kundan boshlab tayinlanadi va kasbiy taʼlim hisobga olinmaydi. Ishsiz fuqaro oʻquv kurslarida qatnashsa ham, toʻlov toʻxtatilmaydi.