2027 жылдан жұмыссыздарға төленетін жәрдемақы мерзімі өзгереді

2027 жылғы 1 қаңтардан бастап Қазақстанда жұмысынан айырылған адамдарға әлеуметтік төлем тағайындаудың жаңа тәртібі күшіне енеді. Төлем мерзімі адам үшін қанша ай бойы әлеуметтік аударым жасалғанына байланысты болады. Еңбек және халықты әлеуметтік қорғау министрлігі тиісті өзгерістерді 2026 жылғы 9 қазандағы №398 бұйрықпен бекітті, деп хабарлайды Egemen.kz.

Жұмыс беруші қызметкер үшін әлеуметтік аударымдар төлейді. Бұл қаражат Мемлекеттік әлеуметтік сақтандыру қорына түседі. Адам жұмысынан айырылған жағдайда оған осы қордан әлеуметтік төлем беріледі. Жаңа ереже бойынша, адам үшін 6 айдан 12 айға дейін әлеуметтік аударым жасалса, төлем бір айға тағайындалады. 12 айдан 24 айға дейін аударым жүргізілсе, төлем екі ай бойы беріледі. 24 ай және одан да көп уақыт аударым жасалса, төлем мерзімі үш айды құрайды.

Төлем мөлшері жеті ең төменгі жалақының 45 пайызынан аспауға тиіс. Есептеу кезінде адамда төлем алу құқығы пайда болған күні қолданыста болған ең төменгі жалақы ескеріледі. Әлеуметтік төлем құқық пайда болған күннен бастап тағайындалады, кәсіптік оқу ескерілмейді. Егер жұмыссыз азамат оқу курстарына қатысса да, оған төленетін төлем тоқтатылмайды.