Favqulodda vaziyatlarga tezkor javob berish va suv omborlari xavfsizligi muhokama qilindi

Prezident Shavkat Mirziyoyev favqulodda vaziyatlarga tezkor javob berish tizimini takomillashtirish hamda suv omborlari va ularga tutash hududlardan foydalanishni tartibga solish boʻyicha taqdimot bilan tanishdi. Davlatimiz rahbari tizimni yangilashda asosiy mezon inson hayotini saqlab qolish boʻlishi kerakligini taʼkidladi. Shaharlarning kengayishi, texnologik rivojlanish va iqlim oʻzgarishi qutqaruv xizmati oldiga yangi vazifalar qoʻymoqda, ayrim yongʻin-qutqaruv qismlari esa tezkor yordam talablariga toʻliq javob bermaydi.

“Oltin daqiqa” qoidasini amaliyotga joriy etish rejalashtirilgan: shahar hududlarida qutqaruvchilarning yetib kelish vaqtini 5-7 daqiqaga, shahar markazlaridan tashqaridagi hududlarda 15-20 daqiqaga tushirish vazifasi qoʻyildi. Aholisi 250 mingdan ortiq tuman va shaharlardagi 25 ta yongʻin-qutqaruv qismini qayta tashkil etish va zamonaviy texnika bilan taʼminlash rejalari taqdim etildi. Shuningdek, “Madad” milliy koʻp tarmoqli maxsus qutqaruv markazini tashkil etish taklif etildi.

Mavjud 56 ta suv omborining faqat toʻrttasida qutqaruv xizmati yoʻlga qoʻyilgan. Shu bois “Karkidon” suv ombori misolida professional qutqaruv tizimini tashkil etish taklif qilindi. Tadbirkorlar uchun turistik xizmatlarni sertifikatlash va professional qutqaruv tuzilmalari bilan shartnoma tuzish taklif etildi. Suv omborlari boʻyicha 2029-yil 1-oktyabrgacha yer va mol-mulk soligʻining yarmini toʻlash koʻzda tutilmoqda. Yigirma beshta suv omborida joyida oʻrganish oʻtkazilgan.