Prezident har yili 1 million yoshga raqamli koʻnikmalarni oʻrgatishni topshirdi

Prezident Shavkat Mirziyoyev Oʻzbekistonda raqamli taʼlim ekotizimini rivojlantirish rejalari bilan tanishdi. Ekotizim taʼlimdan tortib yoshlarning kasbiy koʻnikmalarini tasdiqlash va ishga joylashtirishgacha boʻlgan barcha bosqichlarni qamrab oladi.

Bu yil IT sohasida 300 ming ish oʻrni yaratildi; bu maqsad aslida 2030-yilga moʻljallangan edi. Endi hukumat raqamli iqtisodiyotning yangi yoʻnalishlarini rivojlantirish hisobiga toʻrt yil ichida yana 500 ming ish oʻrni yaratishni maqsad qilgan. Rejalarga koʻra, 2030-yilgacha 5,5 million yoshni anʼanaviy va masofaviy shaklda oʻqitish nazarda tutilgan.

Prezident har yili 1 million yoshni robototexnika, kompyuter oʻyinlari ishlab chiqish, startaplar va boshqa istiqbolli yoʻnalishlarga oʻrgatishni topshirdi. Buning uchun milliy trenerlar korpusi shakllantiriladi, onlayn platformalar va qisqa muddatli raqamli koʻnikma kurslari tezlashtiriladi. Fargʻona tajribasiga asoslangan iOS dasturchilari tayyorlash markazlari yaratish taklifi maʼqullandi. Oʻtgan yili global texnologiya kompaniyalaridan 22 million dollar grant jalb qilingan; maqsad bu yil oxirigacha 60 million, 2030-yilgacha 100 million dollarga yetkazish.