Kartadan kartaga oʻtkazmalarda komissiya undiriladi

Ozarbayjonda 1-apreldan kartadan kartaga pul oʻtkazmalari boʻyicha yangi xizmat haqi tariflari belgilandi. Day.Az unikal.az saytiga havola qilib xabar berishicha, Banklararo Karta Markazida (BKM) qayta ishlanadigan kartadan oʻtkazma va kartaga oʻtkazma operatsiyalari boʻyicha xizmat haqlari oʻtkazilayotgan mablagʻ miqdoriga qarab belgilangan.

Milliy valyutadagi operatsiyalarda 100 manatgacha oʻtkazmalar uchun 3 tiyin, 100,01-1000 manat oraligʻida 10 tiyin, 1000,01-10 000 manat oraligʻida 50 tiyin, 10 000,01-40 000 manat oraligʻida 2 manat va 40 000 manatdan yuqori summalar uchun 4 manat xizmat haqi qoʻllaniladi. Dollar va yevro bilan amalga oshiriladigan operatsiyalar boʻyicha esa 100 birlikkacha 0,03, 1000 birlikkacha 0,10, 10 ming birlikkacha 0,50, 40 ming birlikkacha 2, undan yuqori summalar uchun 4 dollar yoki yevro nazarda tutilgan.

Hukumat Toʻlov portali orqali yuborilgan toʻlov buyruqlarini bajarish uchun esa 1000,01-10 000 manat oraligʻida 1 manat, 10 000,01-40 000 manat oraligʻida 4 manat va 40 000 manatdan yuqori summalarda 8 manat ushlab qolinadi.