Tataristonda bu yil don hosili 4 mln tonnaga yetdi

Tatariston Respublikasida bu yil don hosili 4 mln tonnaga yetdi. Tatariston Respublikasi Rahbari Rustam Minnixanov Qozondagi Kazan Expo maydonida oʻtkazilgan qishloq xoʻjaligi va qayta ishlash sanoati xodimlari kuniga bagʻishlangan tantanali marosimda, qiyin sharoitlarga qaramay, respublikaning agrosanoat majmuasi barqaror ishlayotganini bildirdi.

Minnixanov bu yil qand lavlagi uchun 2,5 mln tonna, kartoshka va sabzavot uchun 1,2 mln tonna hamda 1 mln tonnadan ortiq moyli ekinlar yigʻib olish rejalashtirilganini aytdi. U, shuningdek, chorva mollarini samarali qishlatish uchun yetarli ozuqa tayyorlanganini qayd etdi.

Minnixanov neft kompaniyalariga qishloq aholisiga imtiyozli dizel yoqilgʻisi taʼminlagani uchun minnatdorchilik bildirdi. Bu narxlarning keskin oshishining oldini olishga va dehqonlarga mavsumiy dala ishlarini oʻz vaqtida oʻtkazish imkonini berganini taʼkidladi. Respublika chorvachilik tarmogʻi esa yiliga 2,5 mln tonna sut, 500 ming tonnadan ortiq goʻsht va 2 mlrd dona tuxum ishlab chiqarishni rejalashtirayotgani maʼlum qilindi.