Oʻzbekiston va ICRISAT urugʻchilikda hamkorlikni kengaytiradi

Oʻzbekiston va Yarim quruq tropiklar uchun xalqaro qishloq xoʻjaligi tadqiqot instituti (ICRISAT) urugʻchilik sohasida hamkorlikni kengaytirishni rejalashtirmoqda. Qishloq xoʻjaligi vaziri Ibrohim Abdurahmonov AQShga ish safari davomida institut vakillari bilan ushbu masalani muhokama qildi.

Uchrashuvda ICRISAT vakili Manzur Dar boshchiligidagi mutaxassislar guruhi ishtirok etdi. Tomonlar ilmiy hamkorlik istiqbollari, mutaxassislar oʻrtasida muzokaralarni tashkil etish hamda ustuvor yoʻnalishlarni koʻrib chiqdi. Muzokaralar natijasida yaqinlashib kelayotgan yuqori darajadagi tadbirlar doirasida ikki tomonlama hamkorlik hujjatini imzolash boʻyicha kelishuvga erishildi.

Potentsial hamkorlikning asosiy yoʻnalishlaridan biri seleksiya va urugʻchilik boʻyicha tadqiqotlarni rivojlantirish boʻladi. Iqlim oʻzgarishi, suv resurslarining tanqisligi va qishloq xoʻjaligi mahsulotlariga oshib borayotgan talab sharoitida noqulay sharoitga chidamli, yuqori hosildor navlar yaratish alohida dolzarblik kasb etmoqda. Xalqaro ilmiy markazlar bilan hamkorlik zamonaviy seleksiya usullarini joriy etish, ilgʻor tajriba almashish va mutaxassislar malakasini oshirishga yordam berishi mumkin. Vazirning AQShdagi ish safari davom etmoqda.