Shinjon usuli paxtachilikda yuqori samaradorlikni taʼminlamoqda

Prezident Shavkat Mirziyoyev Guzor tumanidagi paxta dalasiga tashrif buyurdi. Bu yerda “Qashqadaryo Jingu” korxonasi paxtani Shinjon usulida yetishtirmoqda. Davlat rahbariga urugʻ ekish, sugʻorish va parvarish texnologiyalari haqida maʼlumot berildi. 2,2 ming gektar maydonda urugʻlar plyonka ostiga qoʻsh qatorlab ekilmoqda, sugʻorish toʻliq tomchilatib sugʻorish tizimi orqali amalga oshirilmoqda.

Plyonka tuproqda namlik va issiqlikni saqlab, paxtaning erta va bir tekis unib chiqishini taʼminlaydi. Tomchilatib sugʻorish tizimi orqali suv va oʻgʻit toʻgʻridan-toʻgʻri oʻsimlik ildizlariga yetkaziladi. Natijada suv sarfi 30-40 foizga, oʻgʻit sarfi deyarli 30 foizga kamayadi, hosil anʼanaviy usullardagi dalalarga nisbatan 10-15 kun erta pishadi. Dalalarda agrodronlar ham qoʻllanilmoqda.

Anʼanaviy usulda gektaridan 30-35 sentner paxta yigʻiladi, Shinjon texnologiyasi bu koʻrsatkichni 60-70 sentnergacha oshirishga imkon beradi. Korxona dalalarida hosildorlik gektaridan 55 sentnerni, yalpi terim esa 12,3 ming tonnani tashkil etadi. Xitoy investitsiyalari ishtirokida tashkil etilgan agroklaster Kasan, Nishon, Guzor, Qoʻqdala va Mirishkor tumanlarida 18,3 ming gektar maydonni qamrab oladi. Loyihaga 128 million dollar investitsiya kiritilgan, 50 ish oʻrni yaratilgan, eksport hajmi 8,5 million dollarni tashkil etadi.