Özbəkistan və ICRISAT toxumçuluqda əməkdaşlığı genişləndirəcək

Özbəkistan və Yarımquraq tropiklər üzrə Beynəlxalq Tədqiqat İnstitutu (ICRISAT) toxumçuluq sahəsində əməkdaşlığı genişləndirməyi planlaşdırır. Kənd təsərrüfatı naziri İbrahim Abdurahmonov ABŞ-a iş səfəri zamanı institutun nümayəndələri ilə bu məsələni müzakirə edib.

Görüşdə ICRISAT-ı təmsil edən Manzur Dar başda olmaqla mütəxəssislər qrupu iştirak edib. Tərəflər elmi əməkdaşlığın perspektivlərini, mütəxəssislər arasında danışıqların təşkilini və prioritet istiqamətləri müzakirə edib. Nəticədə, yaxınlaşan yüksək səviyyəli tədbirlər çərçivəsində ikitərəfli əməkdaşlıq sənədinin imzalanması barədə razılıq əldə olunub.

Potensial əməkdaşlığın əsas istiqamətlərindən biri seleksiya və toxumçuluq sahəsində tədqiqatların inkişafı olacaq. İqlim dəyişikliyi, su ehtiyatlarının çatışmazlığı və kənd təsərrüfatı məhsullarına artan tələbat fonunda əlverişsiz şəraitə davamlı, yüksəkməhsuldar sortların yaradılması xüsusi aktuallıq qazanır. Beynəlxalq elmi mərkəzlərlə əməkdaşlığın müasir seleksiya metodlarının tətbiqinə və mütəxəssislərin ixtisasının artırılmasına kömək edə biləcəyi bildirilib. Nazirin ABŞ-dakı iş səfəri davam edir.