Oʻzbekistonda sugʻoriladigan yerlarning teng yarmi shoʻrlangan — tadqiqot

Oʻzbekistonning Iqtisodiy tadqiqotlar va islohotlar markazi qishloq xoʻjaligini dekarbonizatsiya qilishga oid ilmiy tadqiqot oʻtkazdi. Markaz matbuot xizmatining xabar berishicha, oʻrganish 19–20-oktyabr kunlari Iqtisodiyot va moliya vazirligida oʻtkazilgan xalqaro seminar doirasida taqdim etilgan.

Baholashlarga koʻra, Oʻzbekistonda issiqxona gazlari umumiy chiqindilarining 17,5 foizi qishloq xoʻjaligi hissasiga toʻgʻri keladi. Agrar sektor chiqindilarining qariyb uchdan ikki qismini metan tashkil etadi, uning asosiy manbai esa chorvachilikdir. Tadqiqotda 2017–2025-yillarda don ekinlari hosildorligi 48 foizga, paxta xomashyosi hosildorligi 71 foizga oshgani, suv olish hajmi esa 22 foizga qisqargani qayd etilgan. Suv tejovchi texnologiyalar qoʻllanilayotgan maydon 2,6 million gektarga yetgan.

Oʻrganishlarga koʻra, sugʻorish suvining 37 foizi kanallarda yoʻqotilmoqda, sugʻoriladigan yerlarning teng yarmi esa shoʻrlanishga uchragan. Ekspertlar 2070-yilgacha muammolar koʻlamini toraytirish boʻyicha takliflar ishlab chiqqan; ular suv resurslarini boshqarishni takomillashtirish, oziq-ovqat yoʻqotishlarini qisqartirish va yerdan foydalanish samaradorligini oshirishni nazarda tutadi.