Prezident Uzbekistan GTL naftasi asosida 1,5 mlrd dollarlik polimer loyihasini taklif qildi

Prezident Shavkat Mirziyoyev 22-oktabrda Qashqadaryo viloyatining ijtimoiy-iqtisodiy rivojlanishiga bagʻishlangan yigʻilish oʻtkazdi. Prezident matbuot xizmatining xabariga koʻra, xususiylashtirishga tayyorlanayotgan Uzbekistan GTL zavodida olinadigan 430 ming tonna nafta asosida 1,5 mlrd dollarlik yangi polimer va neftkimyo mahsulotlari ishlab chiqarish loyihasi taklif etildi. Zavodda umumiy qiymati 300 mln dollar boʻlgan uchta yirik loyiha ham tayyorlangan.

Xususiylashtirilgan Dehqonobod kaliy zavodi quvvatini 365 ming tonnadan 600 ming tonnaga oshirish rejalashtirilmoqda. Kam tonnajli kimyo sohasida 830 mln dollarlik 30 dan ortiq loyiha taklifi tayyorlangan. Masʼul shaxslarga 20 mlrd dollarlik loyihalar va 50 ming ish oʻrnini oʻz ichiga olgan uch yillik dastur tayyorlash topshirildi.

Toʻqqiz oyda viloyat sanoati 8,4%, xizmat koʻrsatish sohasi 16,6%, qishloq xoʻjaligi 4,9% oʻsdi. Viloyat aholi jon boshiga sanoat mahsuloti hajmi boʻyicha mamlakatda yettinchi oʻrinda turadi. Prezident hokimlar va banklar qulay muhit yaratsa, Qashqadaryo bir-ikki yil ichida eng rivojlangan hududlar qatoriga kirishi mumkinligini taʼkidladi.