Qashqadaryoda 500 ming aholiga moʻljallangan Yangi Qarshi shahri barpo etiladi

Prezident Shavkat Mirziyoyev Qashqadaryo viloyatini ijtimoiy-iqtisodiy rivojlantirishga bagʻishlangan yigʻilish oʻtkazdi. Qarshidagi Prezident maktabi Cambridge imtihonlarida 98 foiz natija bilan respublikada birinchi boʻldi. Kosonlik 11-sinf oʻquvchisi Murodjon Xalimov SAT imtihonida maksimal 1600 ball toʻpladi.

Davlat rahbari bunday iqtidorli yoshlar koʻpligini taʼkidlab, aniq fanlarni xorijiy tillarda oʻrgatish imkoniyati yaratilsa, yuqori natijalar har bir tumanda boʻlishini aytdi. Kelasi yildan barcha tumanlarda bittadan maktabda aniq fanlar chet tilida oʻqitiladi. Shuningdek, oʻzbekistonlik yoshlar robototexnika boʻyicha jahon chempioni boʻldi; yil oxirigacha har bir tumanda robototexnika toʻgaragi ochilib, jihozlanadi.

Qarshi shahri, Koʻkdala va Qarshi tumani chegarasida 5 ming gektar maydonda 500 ming aholiga moʻljallangan Yangi Qarshi shahri barpo etiladi. Ikki oyda bosh reja ishlab chiqiladi, dastlab 20 mlrd soʻm ajratiladi.