Hukumat rahbari xorijiy investorlar bilan birgalikdagi loyihalarni muhokama qildi

Bosh vazir Olja Bektenov Shimkentda oʻtayotgan IX Kazakhstan Global Investment Roundtable doirasida Aksa Energy, Carlsberg Kazakhstan, Solico Group va CONTEC kompaniyalari rahbarlari bilan uchrashib, Qozogʻistondagi investitsiya loyihalarini muhokama qildi.

Uchrashuvlarda energetika, oziq-ovqat sanoati, agrosanoat majmuasi va kosmik sohalarda hamkorlikni kengaytirish, ishlab chiqarishni mahalliylashtirish hamda yangi texnologiyalarni joriy etish masalalari koʻrib chiqildi. Mahalliy mahsulot va yetkazib beruvchilar ulushini oshirishga ustuvor ahamiyat berildi. Aksa Energy bilan uchrashuvda Qiziloʻrdada qiymati 215 milliard tenge boʻlgan bugʻ-gaz qurilmasi ishga tushirilgani qayd etildi. Stansiya 240 MVt elektr energiyasi va soatiga 277 Gkal issiqlik ishlab chiqaradi hamda bu yilning iyun oyida tijorat foydalanishga topshirilgan.

Carlsberg Kazakhstan rahbariyati bilan uchrashuvda Almaty viloyatida qiymati 344 million dollar boʻlgan alkogolsiz ichimliklar zavodi bu yilning 1 oktyabrida ishga tushirilgani va u yerda 230 ta doimiy ish oʻrni yaratilgani taʼkidlandi. Kompaniyada Qozogʻiston mahalliy ishtirok ulushi 71,5 foizni tashkil etadi. Solico Group bilan Almaty viloyatida pishloq zavodi qurilishi muhokama qilindi. Taxminan 45 milliard tenge investitsiya kiritilgan zavod yiliga 41 ming tonna mahsulot ishlab chiqaradi va 2029 yilda foydalanishga topshirilishi rejalashtirilgan. Uchrashuvlar yakunida Bektenov vazirliklar va masʼul tashkilotlarga investitsiya loyihalarini qoʻllab-quvvatlashni topshirdi.