Үкімет басшысы шетелдік инвесторлармен бірлескен жобаларды талқылады

Премьер-министр Олжас Бектенов Шымкентте өтіп жатқан IX Kazakhstan Global Investment Roundtable аясында Aksa Energy, Carlsberg Kazakhstan, Solico Group және CONTEC компанияларының басшыларымен кездесіп, Қазақстандағы инвестициялық жобаларды талқылады.

Келіссөздерде энергетика, тамақ өнеркәсібі, агроөнеркәсіп кешені және ғарыш салаларындағы ынтымақтастықты кеңейту, өндірісті жергіліктендіру және жаңа технологияларды енгізу мәселелері қаралды. Отандық өнім мен жеткізушілердің үлесін арттыруға басымдық берілді. Aksa Energy компаниясымен кездесуде Қызылордада құны 215 млрд теңге болатын бу-газ қондырғысының іске қосылғаны атап өтілді. Станса 240 МВт электр энергиясын және сағатына 277 Гкал жылу өндіреді, биыл маусымда коммерциялық пайдалануға берілді.

Carlsberg Kazakhstan басшылығымен Алматы облысында құны 344 млн доллар болатын алкогольсіз сусындар зауыты биыл 1 қазанда іске қосылғаны және онда 230 тұрақты жұмыс орны ашылғаны айтылды. Компания қызметіндегі қазақстандық қамту үлесі 71,5%-ды құрайды. Solico Group компаниясымен Алматы облысында ірімшік өндіретін зауыт құрылысы талқыланды. Жобаға шамамен 45 млрд теңге инвестиция салынып, кәсіпорын жылына 41 мың тонна өнім өндіреді, зауытты 2029 жылы пайдалануға беру көзделген. Кездесулер қорытындысы бойынша Олжас Бектенов салалық министрліктер мен жауапты ұйымдарға инвестициялық жобаларды жүзеге асыруға қолдау көрсетуді тапсырды.