Rossiyada bolani parvarish uchun toʻlanadigan kasallik varaqasi 30 kunga uzaytiriladi

Rossiya hukumati kasal bolani parvarish qilish uchun ota-onalarga beriladigan toʻlanadigan kasallik varaqasi (bolnichniy) muddatini yiliga 30 kunga oshirishini eʼlon qildi. Bu haqda Bosh vazir Mixail Mishustin hukumat yigʻilishida bayon etdi. Xabarni RIA Novosti xabar agentligi bergan.

Hozirda ota-onalarga bolaning kasalligi va yoshiga qarab yiliga 45 dan 120 kungacha toʻlanadigan kasallik varaqasi beriladi. Mishustin ayrim hollarda bolaning toʻliq sogʻayishi uchun koʻproq vaqt kerak boʻlishi, hatto maksimal muddat ham yetmasligi mumkinligini aytdi. Bunday hollarda vaqtinchalik mehnat qobiliyatini yoʻqotish boʻyicha toʻlovlar toʻxtatilgani sababli ota-onalar ishga qaytishga majbur boʻladi.

Hukumat oilalarga yordam berish maqsadida belgilangan har bir muddatni yiliga 30 kunga uzaytiradi. Vaqtinchalik mehnat qobiliyatini yoʻqotish boʻyicha toʻlovlar ham xuddi shunday muddatga uzaytiriladi.