Ресейде сырқат баланы күтуге берілетін ақылы «больничный» мерзімі 30 күнге ұзартылады

Ресей Үкіметі сырқат баланы күту үшін ата-анаға берілетін ақылы «больничный» мерзімін жылына 30 күнге арттыратынын хабарлады. Бұл туралы Премьер-министр Михаил Мишустин Министрлер Кабинетінің отырысында мәлімдеді. Бұл хабарды РИА Новости агенттігі таратты.

Қазіргі уақытта ата-аналарға баланың ауруы мен жасына қарай жылына 45-тен 120 күнге дейін ақылы «больничный» беріледі. Мишустиннің айтуынша, кейбір жағдайларда баланың толық сауығуы үшін көбірек уақыт қажет болуы мүмкін, тіпті ең ұзақ мерзім де жетпеуі ықтимал. Мұндай жағдайда уақытша еңбекке жарамсыздық бойынша төлемдер тоқтатылатындықтан, ата-аналар жұмысқа қайтуға мәжбүр болады.

Үкімет отбасыларды қолдау мақсатында белгіленген әр мерзімді жылына 30 күнге ұзартады. Уақытша еңбекке жарамсыздық бойынша төлемдер де осындай мерзімге ұзартылады.