Rusiyada uşaq baxımı üçün ödənişli xəstəlik vərəqəsi müddəti 30 gün artırılacaq

Rusiya Hökuməti xəstə uşağa baxmaq üçün valideynlərə verilən ödənişli 'bolniçnı' (xəstəlik vərəqəsi) müddətinin ildə ən çox 30 gün artırılacağını bildirib. Qərar Baş nazir Mixail Mişustin tərəfindən Nazirlər Kabinetinin iclasında elan edilib. Bu barədə RIA Novosti xəbər agentliyi məlumat verib.

Hal-hazırda valideynlərə uşağın xəstəliyindən və yaşından asılı olaraq ildə 45-120 gün ödənişli xəstəlik vərəqəsi verilir. Mişustinin sözlərinə görə, bəzi hallarda uşağın tam sağalması üçün daha çox vaxt lazım ola bilər və hətta maksimum müddət də kifayət etməyə bilər. Belə hallarda müvəqqəti əmək qabiliyyətsizliyi üzrə ödənişlər dayandırıldığı üçün valideynlər işə qayıtmalı olurlar.

Hökumət ailələrə dəstək olmaq üçün müəyyən edilmiş hər dövrü ildə 30 gün artıracaq. Müvəqqəti əmək qabiliyyətsizliyi üzrə ödənişlər də eyni müddətə uzadılacaq.