Yaratuvchilik shijoati Qashqadaryoning har bir manziliga yetib bormoqda

Oʻzbekiston Respublikasi Prezidenti Shavkat Mirziyoyev ijtimoiy-iqtisodiy islohotlar bilan tanishish uchun 21-22 oktabr kunlari Qashqadaryo viloyatida boʻldi. 22 oktabr kuni u viloyatning ijtimoiy-iqtisodiy rivojlanishiga bagʻishlangan yigʻilish oʻtkazdi. Prezident shahar, tuman va mahallalardagi oʻzgarishlarni, tadbirkor, investor va yoshlarning koʻzidagi shijoatni koʻrganini va bu unga katta kuch bagʻishlaganini aytdi.

Maqsad yil oxirigacha viloyatni kambagʻallik va ishsizlikdan xoli qilishdir. Yilning toʻqqiz oyida sanoat, xizmatlar va qishloq xoʻjaligida oʻsish taʼminlandi, biroq natijalar viloyatning boy resurslari va inson salohiyatiga hali toʻliq mos kelmasligi taʼkidlandi. Sanoatda qoʻshilgan qiymatni oshirish zarur; uch yillik dastur doirasida 20 milliard dollarlik loyihalar va 50 ming ish oʻrni nazarda tutilgan, oltita sanoat klasteri tashkil etiladi.

Suv va energiya taʼminoti ham yaxshilanmoqda. Kelasi yili 265 kilometr kanal betonlashtiriladi, 300 megavattlik quyosh elektr stansiyasi ishga tushiriladi. 200 ming kishini toza ichimlik suvi bilan taʼminlash va A-380 avtomobil yoʻlining 100 kilometrlik qismini Osiyo taraqqiyot banki bilan qayta qurish rejalashtirilgan.