Oʻzbekistonda pensiya stajini hisobga olish va ustamalarni hisoblash soddalashtiriladi

Oʻzbekistonda pensiya uchun mehnat stajini tasdiqlash, pensiya ustamalarini hisoblash va bir qator toʻlovlarni rasmiylashtirish tartibi soddalashtiriladi. Oʻzgarishlar 19-oktyabrdagi hukumat qarori bilan nazarda tutilgan. Hujjat Pensiya jamgʻarmasining ixchamroq tizimga oʻtishiga qaratilgan boʻlib, 2022-yilda tasdiqlangan pensiya tayinlash va toʻlash tartibiga tuzatishlar kiritadi.

2005-2016-yillarda tashkilotlarda ishlagan fuqarolar uchun staj tasdiqlash osonlashtiriladi. Mehnat daftarchasida tegishli yozuvlar boʻlsa va ish beruvchi xodimning individual jamgʻarma pensiya hisobvaragʻiga majburiy badallarni yiliga kamida bir marta oʻtkazib turgan boʻlsa, bu davr arxiv maʼlumotnomasisiz stajga kiritiladi. Nogironligi bor 18 yoshgacha boʻlgan bolaga parvarish qilish davri ham elektron tibbiy xulosa asosida mehnat stajiga qoʻshiladi.

Pensiya ustamalarining maksimal miqdori arizasiz, proaktiv tartibda hisoblanadi. Nogironlik guruhini qayta belgilash, I guruh nogironlik tayinlash hamda oila aʼzolari soni oʻzgargan taqdirda boquvchisini yoʻqotganlik boʻyicha pensiya miqdorini oʻzgartirish uchun ham avtomatlashtirilgan tartib nazarda tutilgan. 100 yoshga toʻlgan shaxslarga ustamalar proaktiv tartibda tayinlanadi va toʻlanadi. ID-karta almashtirilgan taqdirda pensiya toʻlovi davom etadi. Yashash joyi oʻzgarganda toʻlovlarni oʻtkazish uchun ariza davlat xizmatlari markazlari yoki Yagona interaktiv davlat xizmatlari portali orqali topshiriladi.