Oʻzbekistonda 2028-yildan barcha viloyatlarda saraton skriningi oʻtkaziladi

Oʻzbekistonda 2028-yildan boshlab barcha viloyatlarda oshqozon, yoʻgʻon ichak, prostata bezi va oʻpka saratonini erta aniqlash skriningi oʻtkaziladi. Dasturni amalga oshirishga har yili 700 milliard soʻm ajratiladi. Bu haqda Prezident Shavkat Mirziyoyev sogʻliqni saqlash va farmatsevtika sohasi xodimlari bilan uchrashuvda maʼlum qildi.

Dastur avval Samarqand viloyatida boshlanadi, soʻngra mamlakatning boshqa hududlariga yoyiladi. Shu bilan birga diabet, sil kasalligi, yurak-qon tomir kasalliklari, ayollardagi oʻsmalar va bolalardagi onkogematologik kasalliklarni erta aniqlash dasturlari davom etadi.

Andijon, Fargʻona, Namangan, Samarqand viloyatlari va Toshkentda amalga oshirilayotgan infarkt va insultni erta aniqlash hamda davolash dasturi besh oyda oʻlim koʻrsatkichini 15 foizga kamaytirgan. “Oltin soat” davomida 855 kishi vaqtidan oldin oʻlim va nogironlikdan saqlab qolindi. Keyingi yil bu dasturga 280 milliard soʻm ajratiladi va u barcha tuman hamda shaharlarga yoyiladi. Shuningdek, bepul dorilar soni 73 tagacha, tibbiy koʻriklar soni 36 tagacha oshiriladi.